Ako'y nangangarap na maging isang matagumpay na tao. Mula pa noong aking pagkabata, nais ko nang mag-aral upang maabot ang aking mga layunin sa buhay. Ang kasalukuyang pag-aaral ko ay patunay ng aking kahandaan na harapin ang anumang hamon na maaaring dumating. Sa proseso ng aking pag-aaral, natutunan kong tumayo sa aking sariling mga paa at maging mas responsable sa bawat desisyong aking ginagawa. Umaasa akong ang lahat ng aking pagsusumikap ay magbubunga ng tagumpay sa hinaharap.

Isang mahalagang aspeto ng aking paglalakbay ay ang edukasyon. Ang edukasyon ay isang susi na nagbubukas ng maraming oportunidad para sa isang mas magandang kinabukasan. Bukod sa pagbibigay ng kaalaman, ito rin ang humuhubog sa aking pagkatao. Sa pamamagitan ng edukasyon, natututo akong harapin ang mga hamon ng buhay, gumawa ng tamang desisyon, at magplano para sa hinaharap. Mahalaga ang edukasyon sapagkat ito ang nagtuturo ng mga halagang moral at disiplina na kinakailangan sa pagbuo ng matatag na pundasyon para sa aking mga pangarap. Ang pagtatapos ng aking pag-aaral ay mahalaga upang maabot ko ang pangarap kong maging Architect. Ang propesyon na ito ay hindi lamang para sa aking sariling tagumpay kundi para rin sa layuning makatulong sa iba. Bilang isang Architect, nais kong lumikha ng mga istruktura na hindi lamang maganda kundi may layunin ding pagandahin ang pamumuhay ng mga tao. Sa pamamagitan ng aking kaalaman at talento, hangad kong mag-ambag sa pag-unlad ng aking komunidad at makatulong sa mga nangangailangan, lalo na sa larangan ng imprastruktura at tirahan. Ang pagiging isang Architect ay hindi lamang trabaho para sa akin, kundi isang paraan upang tuparin ang aking misyon na maging kapaki-pakinabang sa lipunan. Alam kong ang landas patungo sa tagumpay ay hindi tuwid at madaling tahakin. Sa bawat hakbang, maraming balakid at pagsubok ang kailangang lampasan. Ang bawat pagkadapa ay nagiging paalala na ang pagbangon ay mahalagang bahagi ng tagumpay. Sa kabila ng mga hamon, nananatili akong matatag sapagkat alam kong ang bawat sakripisyo ay may kaakibat na gantimpala sa tamang panahon. Ang suporta ng aking pamilya at mga mahal sa buhay ay nagsisilbing inspirasyon upang ipagpatuloy ko ang aking paglalakbay.

Malayo pa ang aking tatahakin,at patuloy akong hahakbang nang may determinasyon. Ang bawat hakbang ng aking paglalakbay ay sumasalamin sa mga karanasang nagbibigay lakas upang magpatuloy sa kabila ng mga pagsubok. Ang tagumpay ay hindi lamang nasusukat sa layo ng narating, kundi sa mga hamong nalampasan sa daan. Sa bawat araw na dumaraan, lalong nagiging malinaw na ang pagtitiwala sa sarili, sipag, at tiyaga ang mga susi upang maabot ang tagumpay. Sapagkat sa kabila ng mga hirap at hamon, naniniwala akong darating ang araw na masasabi ko, “Malayo na ang aking narating.”